對於買家黎講，當然係想以較低嘅價錢買到心儀單位，但如果成交價遠低於銀行估價，按揭申請可能會受到影響，甚至有可能被拒。

早前就有一宗個案，單位喺幾間銀行嘅估價大約係1,100萬元，但成交價低於估價達兩成，只有880萬元，結果買家向多間銀行申請按揭都被拒。

銀行拒絕批出按揭嘅原因，係因為擔心買賣雙方喺枱底有不法交易，有兩種情況尤其會引起懷疑：第一係成交無經過物業代理中介；第二係估價高於按揭保險適用嘅範圍，但係成交價又喺允許申請按保嘅範圍，會被懷疑有人為咗申請按保而刻意壓低成交價。

‍